اواخر الشتاااا يارب حد ير ولا يشكر؟

أكيد أي بنت هتقرأ العنوان ده هييجي في بالها إننا هنتكلم عن موضة أواخر الشتاء أو هييجي في بالها إنناهنتكلم عن ألبوم "إليسا" الجديد.
بس بصراحة احنا مش هنتكلم عن موضة أواخر الشتاء.. ولا هنتكم عن ألبوم "إليسا" الجديد.. احنا عايزين نتكلم في موضوع تاني مهم جدًّا بس محتاجين منكو شوية تفكير....
فكري معايا كده وافتكري.. إيه هو الروتين اللي بتعمليه مع نهاية كل شتاء وبداية كل صيف؟؟
افتكرتو..
أكيد لا
طيب أفكرك أنا.. هو إنك بتبدأي تشيلي هدوم الشتا وتطلعي هدوم الصيف صح؟!!!!!!!!
طيب المشكلة فين؟؟؟
المشكلة يا قمر إنك ساعات كتير جدًّا بتشيلي هدوم الشتاء بشكل مش صح، وبالتالي لما ييجي الشتا اللي بعده، وتطلعيها تحسي إنها زي ما تكون قديمة ومكرمشة زيادة عن اللازم أو فيها بُقَع صفراء على الرغم من إن فيه هدوم منها ممكن تكوني جايباها في آخر الشتاء، وفي الوقت ده أكيد بتزعلي وبتقرري إنك تلبسيها في البيت أو إنك ترميها...
وعلشان احنا عارفين إن دي مشكلة كبيرة جدًّا جدًّا وبتحير بنات كتير قووووي..
قررنا النهاردة إننا نتعرف مع بعض على الخطوات اللي ممكن تعمليها علشان تشيلي هدومك الشتوية بشكل صحيح علشان لما ييجي الشتاء التاني تلاقيها جديدة كأنك لسه جايباها ..
وبالرغم من أن الخطوات دي بسيطة جدًّا إلا إنها مهمة جدًّا..
نشوف مع بعض
الخطوة الأولى
طلعي كل الهدوم الشتوي
شوفي يا قمر أول خطوة هتعمليها هي إنك هتفتحي دولابك وهتطلعي كل الهدوم اللي عندك وتحطيها قدامك على السرير، وتبدئي في فحصها قطعة قطعة، وده علشان تشوفي الهدوم اللي فيها أي قطع أو أي شد وتخيّطيها كويس.
الخطوة الثانية
نضفيها كويس
طبعًا السؤال اللي بيدور في دماغك دلوقتي هو: ازاي تنضفي الهدوم الشتوي؟؟
شوفي يا قمر:
بالنسبة للهدوم الصوف:
اللي هي زي "البلوفرات" أو "الباديهات" أو "الكوفيات" فلو هتغسليها في الغسالة يبقى اختاري البرنامج البارد من غير عصر، وبعد كده طلعيها وافرديها على الحبل لغاية ما تنشف.
لكن لو هتغسليها علي إيدك يبقى انقعيها الأول لمدة ساعتين في مياه باردة، وبعد كده اغسليها بالصابون كويس، وبعد كده اشطفيها أكثر من مرة بالمية علشان تتأكدي إن مفيش فيها أثر للصابون وبعد كده سيبيها لما تصفي ميتها، واوعي تعصريها، وبعد كده افرديها على الحبل لغاية ما تنشف.
أما بالنسبة للجواكت الجلد:
ممكن توديها التنضيف أو إنك تنظفيها بنفسك في البيت بإنك تجيبي فرشاة وسط بين الناعمة والخشنة، وتحطيها في مياه بمسحوق غسيل وبعد كده تبدئي في دعك الجاكيت بيها، وبعد كده تجيبي فوطة مبللة بالمياه وتمسحي الجاكيت بيها، وبعد كده تجيبي فوطة تانية بس تكون ناشفة وتنشفي الجاكيت كويس، وبعد كده تعلقيه على الحبل لغاية ما ينشف.
الخطوة الثالثة
شيليها صح
شوفي يا قمر: يا ريت البلوفرات أو أي حاجة صوف عندك تتطبقيها بشكل كويس وتحطيها في كيس الملابس اللي عندك وتحطيها في سحارة السرير وده أحسن حل علشان تحافظ على شكلها ولما تيجي تلبسيها تلاقيها كأنك لسه جايباها..
وبلاش موضوع إنك تعلقيها على الشماعة لأن الشماعة بتبهدل الهدوم الصوف والتريكو وتخليها تترهل.
أما بالنسبة للجواكت الجلد فدي تلبسيها أي كيس ملابس عندك أو حتى كيس بلاستيك كبير، وتعلقيها في الشماعة، وتحطيها في الدولاب.
خدي بالك قوي من شوية الحاجات البسيطة دي...
دي كمان شوية حاجات يا ريت تاخدي بالك منها وهي:ـ
1 ـ إنك تسيبي الهدوم تنشف كويس جدًّا واوعي تشيليها وهي مبلولة أو فيها أي آثار للمياه؛ لأنك لو عملتِ كده وشيلتيها ممكن يصيبها العفن.
2 ـ بلاش تستعملي الشماعات المصنوعة من السلك الضعيف واستخدمي شماعات مصنوعة من البلاستيك القوي أو شماعات خشبية لأن دي بتحافظ على الملابس أكتر.
3 ـ تخزين الملابس لفترات طويلة ممكن يتسبب في تغيير رائحتها إلى ريحة مش لطيفة، وعلشان تتغلبي على المشكلة دي يا ريت تحطي صابون بريحة وسط الهدوم دي أو تجيبي أكياس معطرة للملابس، وتحطيها وسط الهدوم.
4 ـ لو لقيتِ عندك أي بلوفر أو أي حاجة صوف دايبة يبقى بلاش تشيليها مع البلوفرات السليمة.

5 ـ اوعي تسمعي كلام حد يقولك إنك تشيلي الهدوم وهي مش نظيفة وتبقي تغسليها الشتاء اللي جاي لأن الهدوم اللي مش نظيفة بتجيب العتة والحشرات اللي ممكن تكون سبب في دوبان الهدوم بسرعة..

ولغاية هنا وخلص كلامنا المرة دي

شكرا ويا ريت مواضيع اكتر

thanks 4 u شكرن ليك انك اهتميت ورديت البركة فيك وناببعت المواضيع دية للناس اللي بتقدر وتهتم وتشكر